人去到某個年紀，最怕聽到嘅，已經唔再係工作上有幾忙，而係舊相識一個接一個傳來壞消息

前幾日知道一位舊公司女同事患上癌症，而且聽講試過幾項治療都唔見效。之後另一位舊同事傳話問我，有冇時間一齊約出嚟食餐飯、聚一聚？

記得大約 2000 年代初期，仲喺舊公司做緊嗰陣，我同呢位女同事唔算好深交，不過都算幾好傾。間中我會幫佢安裝電腦、裝 Windows XP、教佢上網之類。後來有幾次，佢送咗幾張酒樓晚飯 coupon 畀我，算係一種答謝。此後有一段日子，我哋間中都會一班舊同事出嚟食晚飯、食生日飯。直到大約 12 年前舊公司解散之後，彼此都仲有聯絡。

不過去到 2019 年，香港發生巨變，難免有唔少舊同事因為政見唔同，慢慢少咗見面，甚至少咗聯絡。再到後來新冠疫情幾年，呢類飯局基本上就中斷咗。人與人之間，有時就係咁，唔一定有咩大衝突，只係時勢變咗、生活變咗，距離就慢慢遠咗。

2014 年第一次睇《Interstellar 星際啟示錄》時，其中一幕我到而家都仲記得。男主角同隊友落咗米勒星，表面上只係停留咗幾個鐘，但當佢哋返到太空船，先發現對留守船上嘅人嚟講，原來已經過咗 23 年。

呢種感覺，今日我忽然好有共鳴！

2026 年回頭望返 2000 年代，原來已經過咗 26 年。日復一日、月復一月、年復一年，其實真係快得好唔真實。有時午夜夢迴，總會有一種錯覺，好似好多往事只不過係幾年前、甚至幾個月前發生，但原來時光早已靜靜哋流走咗咁多年。呢個世界好似冇變，但其實我哋每一個人，都已經被時間推前咗好遠。

講返呢位舊同事，直到今日為止，始終唔算得上係好深交嘅朋友。不過我哋生命入面，可能只係同行過一段路，但嗰段路又真係一齊行過。當知道對方有病要接受各種治療，可能捱得好辛苦，甚至唔知仲有幾多時間，嗰種無力感同惋惜，真係會令人心入面好唔舒服。

記得 2010 年上普通話課時，老師曾經朗讀過一篇網上文章。大意係話，人生每一個階段，都會遇上一啲朋友陪你行過一段路；之後又會因為種種原因，慢慢離開彼此嘅生活。去到下一個階段，你又會遇上另外一班人，再一齊經歷另一段旅程。呢種相遇與散去，其實一直都會循環。

呢個道理，我一直都明白

只不過，明白還明白，當真係聽到一位曾經認識、曾經相處過、曾經一齊行過一段路嘅人，突然傳來咁樣嘅消息，原來人始終都係會難受，始終都係會惋惜。尤其去到而家呢個年紀，愈來愈知道，有啲人你以為總有機會再見，點知原來人生未必真係會俾你咁多「下次」。

如果今日仲有機會，我都想再見一見呢位舊同事。雖然自己都知道，未必幫到佢啲咩，但我至少想佢知道，呢一位舊同事、舊朋友，心裡面仍然記得大家曾經一齊行過同一段路，經歷過一啲事情。嗰段日子，對我嚟講唔係完全冇痕跡，亦唔係話過去就過去。

人生苦短，生命無常

去到今時今日呢個年紀，無論係對家人、舊同事、朋友，甚至係寵物，我愈來愈覺得，有機會見就應該見多啲；有說話想講，就應該講；有愛意想表達，就唔好收埋。因為你永遠唔會知道，下一個月、下一年，甚至下一次，會發生啲咩事。

可能一次普通嘅見面，一餐平平無奇嘅飯局，原來就已經係彼此人生入面最後一次都唔定。