12 年 iMac 與 5 年 PC：何時應該止損，何時應該擱置？

近排我真係唔係好想再搞咁多軟硬件啲嘢

自從 5 月中身體有啲轉變，要重新調整返生活節奏之後，我開始覺得，人去到某個階段，時間、精神同專注力，真係比好多嘢都更加值錢。以前遇到電腦有問題，第一時間一定係自己上網搵方法、試呢樣試嗰樣，總之點都想救返佢。但而家個心態好似真係有啲唔同咗，未必再想凡事都同部機搏到底。

上個月，一部用咗大概 5 年嘅 PC，做完自動 Windows Update 之後突然 boot 唔起。我試過幾個官方方法，都係冇辦法復原。嗰陣其實已經有少少心煩，不過因為部機近兩年已經唔係主力，加上我又真係冇乜心機再折騰，最後索性擺埋一邊，冇再理佢。

點知好衰唔衰，過去個星期日，我本來只係想開另一部 2014 年買、平時都比較少用嘅 iMac 嚟聽下網台，點不知佢又突然完全冇反應。連開機聲都冇，蘋果 logo 又見唔到。嗰一刻我真係忍唔住心諗：唔係呀嘛，兩部機要唔要咁齊心？

不過冷靜落嚟諗，其實又好似唔算太意外。部 iMac 到而家已經 12 年，部 PC 都用咗 5 年。講真，兩部機機齡都唔輕。尤其部 iMac，過去 6、7 年間已經整過兩次，換過 SSD，又換過一啲零件。今次如果再整，我開始會問自己：仲值唔值得？定其實只係自己有感情，唔係好捨得放手？

呢排我一路諗呢件事，腦入面不斷浮出兩個字：沉沒成本 Sunk Cost

所謂沉沒成本，即係你已經付出咗、但永遠收唔返嘅成本。可以係錢，可以係時間，可以係心機。理性上，過去花咗幾多，其實唔應該影響你今日點決定。但現實係，人好多時就係因為已經投放咗太多，所以更加唔甘心停低。好似部 iMac 咁，之前都整過兩次，今次再出事，好自然會有個念頭：「都整咗咁多次，不如再試多次啦。」但再諗深一層，之前啲維修費其實一早已經收唔返，佢哋根本唔應該成為今次再掟錢落去嘅理由。

部 iMac 雖然近年少用，但始終陪咗我好多年，聽網台、睇相、閒時開嚟用下，總有啲感情。好在以前一路有做 Time Machine backup，所以入面啲 data、相片，理論上將來如果有另一部 Mac，仍然可以還原返。即係話，今次真係唔整，都唔係世界末日。講到尾，呢部機嘅購買價值，其實一早已經 write-off，之前兩次整機嗰啲錢，亦都係沉沒成本。再整一次，整返好又可以用幾耐？半年？一年？其實冇人知。與其話係維修，不如話更似係用錢去延長自己一份唔捨得。

至於部 2021 年嘅 PC，情況又有少少唔同。佢唔算好舊，硬件應該冇事，理論上我如果肯花時間重裝 Win11，部機大機會係救得返。加上我又冇將咩重要資料擺喺入面，工作 files 一早上晒 OneDrive，所以重裝唔算有咩大風險。問題只係，我而家真係想唔想咁做？

呢個先係關鍵

因為近兩年，我工作上其實已經慢慢集中返用而家部 MacBook Pro M3。做正經嘢、寫文、日常處理工作，Mac 對我嚟講真係順手好多。再加上近排我喺 AI 工具同工作流程方面，已經花咗唔少時間心力去搞返 OpenClaw，同埋開始用 Hermes Agent 幫手處理日常事務。如果連部暫時根本唔係主力嘅 PC，我都要即刻抽時間去重裝、再慢慢執返好，坦白講，我覺得個人會幾攰。

講到呢度，其實另一個概念就走咗出嚟：時間的機會成本 Opportunity Cost of Time

時間嘅機會成本，唔係啲咩好高深嘅理論，簡單講就係：你揀咗做一樣嘢，就代表你放棄咗另外一樣嘢。你花咗幾個鐘去救部 PC，就等於你冇用嗰幾個鐘去休息、去做運動、去處理正職，或者寫篇自己想寫嘅文章。去到而家，我愈來愈覺得，時間其實比金錢更加奢侈。尤其當身體開始提醒你要調整節奏，呢樣感覺就更加明顯。

所以如果問我，今次應該點部署，我而家暫時畀自己嘅答案係：iMac 止損，PC 擱置

iMac 個情況比較清楚。12 年機齡，整過兩次，今次又完全冇反應，我自己亦真係唔想再整。係有感情，但都係時候接受，有啲舊物總會有退場嘅時刻。將來如果要處理，最多都係拆返入面仲有用嘅 RAM 同 SSD 出嚟，再諗點安排。

至於部 PC，我反而唔想太快判佢死刑。佢未必冇價值，只不過係我現階段唔想將時間放喺佢身上。咁不如索性擱置住先，等之後真係有空、有心情，再決定係重裝 Windows、賣咗佢，定甚至裝其他系統玩下。唔急，真係唔急。

到咗而家，我開始覺得，電腦壞咗，有時考驗你嘅唔一定係技術，而係取捨。究竟你仲想唔想再為一部舊機花心力？究竟你係真係需要救返佢，定只係唔甘心？究竟你而家最值得擺時間落去嘅，係修理一部機，定係照顧返自己生活真正重要嗰部分？

我未必已經有一個最完美答案，但起碼今次我提醒咗自己一樣嘢：有得整，唔等於值得整；未壞到底，亦唔代表要即刻救。 有時識得止損，有時識得擱置，反而先係成熟。