人總係會犯賤，尋晚我完美示範咗咩叫「自己攞嚟衰」
話說尋晚無啦啦手痕，走去用 Homebrew 裝啲新 commands 出嚟玩。心諗，試吓新嘢啫，風險極低，唔啱用咪剷鬼咗佢囉。點知試到一個叫 safe-rm 嘅指令時，個名明明叫「Safe」，但我一時手快眼殘，竟然將成個 Homebrew 目錄連埋下面啲子目錄，一波帶走「搞掂埋」！呢次真係名符其實嘅仆街了！
慘劇發生後，我個大內總管「OpenClaw 系統」即刻扯白旗！所有 Skills 徹底失效，Gateway Control Dashboard 網頁完全死機，連用 openclaw doctor –fix 都係得個吉。急急腳上網求救問其他 AI，全部都係廢話，對症下藥？完全冇！就算我夾硬重裝 Homebrew 同 Node 都無力回天。好彩 Telegram Channel 仲未斷氣，即刻 call 我個專屬 AI 助手「包包」救亡，可惜系統已經強逼 fall-back 咗去低階弱智 Models，包包都愛莫能助。
走投無路之下，今朝唯有祭出終極大絕——最暴力嘅「時光機」還原大法！幸好部 MacMini 有駁 NAS，每個鐘頭都有做 Time Machine Backup。於是，我硬住頭皮將部機推倒重來，祈求可以帶我返去尋日下午 5 點未出事嘅平行時空。
經過 6 至 7 個鐘嘅瘋狂折騰，用一隻已裝 OCLP USB 重新開機，再順手將部老爺 MacMini Late 2014 升級埋上 macOS 14.8.5。皇天不負有心人，個系統終於成功還原！
不過，系統係翻生，但入面 Orbstack 嘅 Docker containers 已經散晒，MySQL Database 亦都神仙難救。好彩，之前「包包」留咗個「救命錦囊」畀我，入面寫足復原步驟。我跟住做，前後 3 個 steps，乾淨俐落將呢個 WordPress 網站從地獄拉返上嚟！呢一刻，我真係好欣賞自己鍥而不捨嘅精神，同埋嗰個「每個鐘 Backup 一次」嘅優良習慣！當然，仲要多謝「包包」個神級錦囊。
直到今日下午 4 點，macOS、Cloudflare Tunnel 、Homebrew、Orbstack Docker、WordPress 同埋 OpenClaw 全部大步檻過，恢復正常運作！
大佬呀，我個 WordPress 網站 3 月底先至浴火重生，滿月都未夠，我點會咁容易畀你收檔呀！經過今次，我學識咗四個字：安分守己。
後記
該文章寫作日期為 24 Apr 2026，受到教訓後，自己領悟到以下幾點：
- Host 機唔好用嚟「試刀」生產環境 (Production) 千祈唔好用嚟試新玩具
- rm -rf 指令嘅恐懼要刻入骨髓
- 小心所謂嘅「安全替代品」好似 safe-rm 呢啲工具，往往令人放低戒心
- 定期做 Backup 同埋演習「災難恢復」