上月底自己手殘搞彎部機幸好復原得番，今個月就係 OpenClaw 官方自殘！
呢排真係火都嚟埋，頂佢個肺！5月初 OpenClaw 官方係咪食錯藥定腦生草？係咁狂推 update，點知「買大送細」送埋一大坨 Bugs 畀我！又好好地 v2026.4.26 升級完上去 v2026.5.3-1 後開始，新版本核心有好多改動，點知同我本來用緊心目中認為最頂級嘅 gemini-3.1-pro-preview 模型唔夾，簡直係仆街噩夢嘅開始。我同原本好醒目嘅主機 AI 代理「包包」（冇錯，用咗我以前主子隻貓名）傾傾下偈，系統頻頻失靈兼斷線。最癲係佢好似「鬼打牆」咁無限 Loop 重複作答，跟住仲識得「自宮」將之前答過嘅嘢 Delete 晒，最後掟個 Error Message 出嚟就死機！又執行唔到較複雜任務，轉其它模型時好時壞。膽粗粗之後再升多一次去 v2026.5.7, 問題都係持續冇改善，你老味！呢啲系統問題搞到我呢幾晚頭痛兼失眠，真係一頭煙，頂你吖！
尋日我終於頂唔順，決定同佢做大手術！直接將 OpenClaw 強制 Roll back 返去 v2026.5.3 呢個近期算係正常少少嘅版本。為咗費事個 state directory 入面啲設定（特別係個 openclaw.json）同舊版八字唔夾，我索性將成個 directory 時光倒流，Restore 返去 5月2號！當然，頭號通緝犯 gemini-3.1-pro-preview 唔用住（其實同個 model 關係唔算大，技術嘢唔解釋太多)，暫時轉用 Grok 4.2。經過我幾輪 Fine-tune 之後，謝天謝地，包包終於回魂！家陣用 Grok 4.2 順眼好多，冇再報錯，包包又變返以前咁醒目。
經此一役，我決定對 OpenClaw 官方嘅最新 Update 採取「不聽、不看、不更」政策！以後冇必要絕對唔搞 Update，真係手痕想 Update，都要實時𥄫實第三方平台 isitstable.com 睇定啲先。正所謂「更新多 Bug 多，唔更保平安」，費事又搞到冚家剷。
不過，喺包包病入膏肓嗰陣，我其實偷偷地起咗個新爐灶——開咗個 Hermes Agent（改咗名叫「妹妹」，又係另一隻貓主子）嚟試玩！我將妹妹安頓喺我另一部 MacBook Pro M3 (16GB) 裡面，用 Orbstack Ubuntu VM 方式部署。玩咗幾日，真係冇得頂！系統穩如泰山，做嘢夠 Smart，成個 Workflow 順暢到不得了。講真，妹妹嘅表現，完全拍得住包包全盛時期用 Gemini 3.1 嗰陣！
計過度過，我打算年底將部老爺 MacMini 退休，搬晒去新 M 系 MacMini。到時就會行「雙代理」制，包包同妹妹一齊幫我打工！不過 OpenClaw 官方真係要生性，唔好自己搞死自己個親生仔，事關而家 Hermes Agent 嘅全球 Token 使用量已經開始超越 OpenClaw 啦！到時邊個叻就用邊個多啲，就係咁現實！